980 - Galeria_single | MMPH

Ministri i Mjedisit dhe Planifikimit Hapësinor, Fatmir Matoshi, vizitoi sot Komunën e Ferizajt, me ç’ rast së bashku me Kryetarin e  kësaj komune Agim Aliu,  diskutuan rreth projekteve që MMPH këtë vit po realizon  në fushën e mjedisit dhe planifikimit hapësinor në këtë komunë. 

Pas takimit me kryetarin Aliu, Ministri Fatmir Matoshi, në një adresim para medieve deklaroi se shuma e ndarë për projekte në komunën e Ferizajt, të financuara nga MMPH kalon shumën e 1  milionë eurove. 

Matoshi ka prezantuar projektet që këtë vit MMPH do të realizojë në këtë komunë, duke u nisur nga Ndërtimi i parkut memorial të UÇK-së në Jezerc, në vlerë prej 400 mijë euro, Rregullimi i shtratit te lumit Sazli prej hekurudhës në Ferizaj deri tek lumi Sitnicë-Ferizaj, në vlerë totale 500 mijë si dhe projekti për funksionalizimin e Bifurkacionit në Nerodime, në vlerë prej 257 mijë euro.   

“Komuna e Ferizajt është po ashtu fituese e fushatës “Ta pastrojmë Kosovën”, dhe për këtë ne i kemi ndarë një shpërblim prej 150 mijë euro”, deklaroi ministri Matoshi. 

“Ne si ministri, komuna e Ferizajt, shoqëria civile dhe të gjithë qytetarët duhet të punojmë për një ambient të pastër. Unë jam i lumtur që në emër të Ministrisë dhe qeverisë do të ofrojmë mbështetje për projekte që disa kanë përfunduar e disa do të përfundojnë në vitin e ardhshëm”, deklaroi nder të tjerash Ministri Matoshi. 

Nga ana tjetër Kryetari i Komunës së Ferizajt, Agim Aliu pasi falënderoi Ministrin Matoshi për përkrahjen theksoi se ka marrë mbështetjen nga ai  për ndërtimin impiantit të ujërave të zeza e cila do të fillojë me nënshkrimin e marrëveshjes në mes të Qeverisë së Kosovës dhe Qeverisë së Hungarisë.

Matoshi e Aliu kanë biseduar edhe rreth sigurimit të rezervave të reja ujore në mënyrë që të sigurohet furnizim i rregullt me ujë të pijshëm për të gjithë banorët, dhe për këtë Matoshi është zotuar që do të angazhohet maksimalisht.