RAPORTO

veprime ilegale

Reshitaj në Samitin e Sofjes, kërkon përkrahje për mjedisin

Në kuadër të Samitit të Sofjes, ministrja e Mjedisit dhe Planifikimit Hapësinor Albena Reshitaj, bashkë me Kryeministrin Haradinaj, zv/Kryeministrin Pacolli e zyrtarë tjerë shtetëror, mori pjesë në Forumin Ekonomik të Vjenës, ku para përfaqësuesve të lartë të shteteve e bizneseve foli për rëndësinë e trajtimit të problemeve mjedisore në mënyrë të përbashkët.

“Po synojmë të krijojmë një mjedis institucional ku ekonomia e tregut do të jetë në hap me ambientin. Qëllimi ynë final është ndërtimi i një ekonomie të gjelbër dhe të një kapitalizmi ekologjik, ku do të zbatohen teknologjitë e pastra dhe energjia e ripërtëritshme” deklaroi ministrja Reshitaj.

Më tej ministrja Reshitaj kërkoi nga shtetet pjesëmarrëse përkrahje me  investime  në energji të ripërtëritshme, zvogëlimin e emetimeve, menaxhimin efikas të mbeturinave, fuqizimin e ekonomisë së gjelbër  dhe zbatimin e teknologjive të pastra.

Në fund Reshitaj deklaroi që ne si shtet e vlerësojmë si shumë të rëndësishëm bashkëpunimin, shkëmbimin e përvojave dhe praktikave të mira edhe me vendet tjera të Ballkanit Perëndimor, duke forcuar edhe më tutje dialogun rajonal dhe fqinjësinë e mirë.

Gjatë këtij forumi ministrja Reshitaj takoi udhëheqës të këtij forumi, liderë shtetesh e biznesesh nga Bashkimi  Evropian e Ballkani Perëndimor, me të cilët diskutoi për rritjen e bashkëpunimit ndërshtetëror në fushën e mjedisit dhe planifikimit hapësinor.